Við höfum áður greint frá því að bráðlega yrði tekin í notkun ný lénaending fyrir Asíu eða .asia. Nú hefur verið opnað fyrir skráningar vörumerkjaeigenda á lénum sem eru eins og vörumerki þeirra. Hafa þessir aðilar forgang til 30. október næstkomandi til að leggja inn umsókn um lén. Við viljum því biðja þá sem hafa áhuga á að skrá .asia lén að hafa samband við okkur sem fyrst með því að senda póst á domain@arnasonfaktor.is. Nánari útskýringar á fyrirkomulagi skráninganna eru hér að neðan sem og upplýsingar um skilyrði og kostnað auk þess sem nokkrum algengum spurningum er svarað.

Athygli er vakin á því að ekki er nauðsynlegt að eiga skráð vörumerki í Asíu né vera með skráða starfsemi þar. Nóg er að eiga skráð vörumerki hvar sem er í heiminum.

Til að tryggja að eigendur vörumerkja og fyrirtækja njóti forgangs er umsóknartímabilinu skipt í nokkur mismunandi forgangstímabil (sunrise periods).

Sunrise 2A frá 9. til 30. október 2007

Þetta tímabil er ætlað þeim sem eiga skráð vörumerki (orðmerki) og vilja sækja um .asia lén. Skilyrðin eru þau að sótt hafi verið um vörumerkið fyrir 16. mars 2004 og að lénið sem sótt er um verður að vera nákvæmlega eins og merkið nema ef tæknilegar ástæður koma í veg fyrir það s.s. sérstafir. Því er möguleiki á að leggja inn umsókn með D í stað Ð, AE í stað Æ eða T og/eða TH í stað Þ.

Umsækjandi verður að leggja inn gögn sem sanna notkun á merkinu til dæmis auglýsingar, bæklinga eða annað efni.

Umsóknir sem ekki uppfylla skilyrðin verða sjálfkrafa færðar í Sunrise 2B ef engin önnur umsókn um sama lén barst.

Sunrise 2B frá 13. nóvember 2007 til 15. janúar 2008

Ætlað þeim sem eiga vörumerki sem sótt var um fyrir 6. desember 2006. Ekki þarf að sýna fram á notkun á merkinu, en lénið þarf sem fyrr að vera nákvæmlega eins og merkið.

Þær umsóknir sem ekki uppfylla skilyrðin verða færðar sjálfkrafa í “landrush” (sjá neðar).

Sunrise 2C frá 13. nóvember 2007 til 15. janúar 2008

Þeir umsækjendur sem hafa fengið umsókn samþykkta í sunrise 2A eða eiga umsókn í vinnslu í sunrise 2B, geta sótt um forskeyti eða endingar við merki sitt á þessum tíma. Allar viðbætur við lénið verða að tengjast þeim flokki sem vörumerkið er skráð í og verða að hafa verið notaðar.

Umsóknir sem uppfylla ekki skilyrðin verða sjálfkrafa færðar í “landrush”.

“Landrush” byrjar í febrúar 2008

Í febrúar er áætlað að opnað verði fyrir skráningar umsækjenda um lén sem ekki eiga samsvarandi vörumerki skráð. Ekki hafa enn verið settar fastar dagsetningar á þetta stig. Þegar “Landrush” byrjar mega allir sem kæra sig um skrá hvað sem er. Það tímabil stendur yfir í um það bil mánuð, en ef tvær eða fleiri umsóknir berast um sama lén verður haldið uppboð á því á milli umsækjenda að tímabilinu loknu. Að “landrush”-tímabilinu liðnu í mars verða skráningar gefnar frjálsar en þá gildir reglan að fyrstur kemur fyrstur fær.

Algengar spurningar.

Hvað kostar að skrá .asia lén?

Fastur kostnaður við nýskráningu á .asia léni til tveggja ára er USD 800 fyrir fyrstu tvö árin. Innifalið í því er skráning á léninu til tveggja ára og gjöld sem skráningarðilar taka fyrir að fara yfir umsóknir. Ýmis föst gjöld er rukkuð af opinberum aðilum vegna nýrra umsókna og því verða endurnýjanir töluvert ódýrari.

Skiptir máli hversu fljótt umsókn er lögð inn?

Það skiptir máli hvort umsóknir eru lagðar inn í SR2A, SR2B eða SR2C. Umsókn sem lögð er inn í SR2A hefur forgang yfir umsókn um sama lén sem lögð er inn í SR2C eða SR2C. Umsókn sem lögð er inn í SR2B hefur og forgang yfir umsókn sem lögð er inn í SR2C. Dagsetningar skipta ekki eins miklu máli svo framarlega sem umsókn er lögð inn áður enn frestur til að sækja um í viðeigandi flokki rennur út. Þannig myndi umsókn sem lögð er inn í SR2B þann 10. janúar 2008 hafa forgang fram yfir umsókn sem lögð væri inn í SR2C 20. nóvember 2007.

Hvað gerist ef tvær eða fleiri umsóknir um sama lén berast og allar umsóknir uppfylla skilyrðin?

Ef sú staða kemur upp að tveir eða fleiri aðilar sækja um sama lénið á sama SR-tímabili og umsóknir þeirra uppfylla öll skilyrðin verður lénið boðið upp á milli þeirra aðila sem um það sóttu. Nauðsynlegt er að umsækjendur búi sig undir þann möguleika að lén þeirra endi á uppboði og ákveði hversu mikið það skiptir þá fjárhagslega að fá lénið.

Þarf að vera með skráða starfsemi/umboðsmann í Asíu til að sækja um lén?

Ekki þarf að vera með skráða starfsemi í neinu af löndum Asíu til að uppfylla skilyrðin og fá skráð .asia lén. Hins vegar þarf umsækjandi að tilgreina umboðsmann með sem er með aðsetur í einhverju af löndum Asíu. Það nægir að tilgreina umboðsmann í einu af eftirfarandi þremur hlutverkum; rétthafi, tengiliður rétthafa (admin-contact) eða tæknilegur tengiliður (tech-contact). Arnason Faktor getur að sjálfsögðu útvegað umboðsmann á svæðinu.

Hvernig skrái ég .asia lén?

Hafðu samband við okkur sem fyrst og takið fram lén sem á að skrá. Einnig skal taka fram hvort umsækjandi eigi vörumerkjaskráningu einhvers staðar í heiminum og í hvaða flokkum, ef Árnason Faktor hefur ekki verið umboðsmaður fyrir hana.

Hvað ef ég á ekki vörumerki?

Þeir sem eiga ekki vörumerki verða að bíða þar til skráningar verða opnaðar almenningi í febrúar (“landrush”). Við hvetjum þá aðila þó til að hafa samband við okkur og leggja inn umsókn, þar sem við getum beðið umboðsmann okkar um að skrá lénið um leið og opnað er fyrir skráningar. Það eykur líkur á að lén fáist miðað við ef slíkt er reynt upp á eigin spýtur. Það er þó ekki tryggt að lén fáist með þesum hætti.

Ekki hika við að senda okkur fyrirspurn ef einhverjar fleiri spurningar vakna. Einnig biðjum við viðskiptavini okkar að láta okkur vita sem fyrst hvaða lén þeir hyggjast sækja um til að þeir missi ekki af fyrsta forgangstímabilinu sem lýkur þann 30. október.