Landsbundna lénið fyrir Kína, “.cn”, er nú orðið þriðja mest skráða landsbunda lénið í heimi en aðeins landsbundnu lénin í Þýskalandi (.de) og Bretlandi (.co.uk) eru fleiri. Samkvæmt tölum frá maí, eru nú um 5,3 milljónir vefsíða með endinguna .cn eða fimm sinnum fleiri en í lok árs 2005. Á þeim tíma var .cn lénið jafnframt í 6. sæti yfir vinsælustu lénin en í því 13. árið áður, eða í lok árs 2004. Vöxtur netsins í Kína er því umtalsverður, en í Kína hafa 140 milljónir manna aðgang að netinu, þó takmarkaður sé, en það er annar mesti fjöldi í einu landi í heiminum á eftir Bandaríkjunum.

Yfirvöld í Kína hafa jafnframt lagt sitt af mörkum til að flýta skráningum á lénum. Undanfarið hefur almenningi í Kína verið gert kleift að skrá lén fyrir aðeins 8 krónur ári og vegna góðra undirtekta hefur tilboðið verið framlengt til áramóta. Einnig er hægt að skrá lén með mandarískum stöfum, en ekki bara latneskum, sem hefur aukið vinsældir þeirra á meðal fjöldans til muna. Hins vegar eru litlar takmarkanir og skilyrði fyrir skráningum og hefur það auk hins lága verðs leitt til þess að fjöldi lénatökumanna og lénasafnara, bæði kínverskir og alþjóðlegir, hafa safnað gríðarlegum fjölda af .cn lénum og skiptir þá engu hvort um lögleg lén eða þekkt vörumerki er að ræða. Enn sem komið er er ekki einfalt að ná tilbaka léni sem hefur verið ólöglega skráð, en eftir því sem Kínverjar taka sig á í hugverkaverndarmálum er von til að fyrr en síðar nái sú viðleitni einnig til léna.